Деревняын гöгöр лöнь —
Юöр локтöма пö тöн:
Тэчны колö котома,
Сар пö осьтöма война.
Сарлöн юрын вöлöм дума:
Менам отир эм пö уна.
Тэ, германеч, эн кутчись,
А кутчисян-кö — видзчись!..
Лэдза войско тэвлö паныт —
Локтас сэки юрломанат.
Понда куртны бокö сiдз,
Оз и пушка тэнö видз.
Менам войско немись оз пов,
Сыкöт дыр баитны оз ков.
Шуа: «Биö, ноко, пыр!
Öтiк мортöдз пырас — ырр!..
Но, а юр кö кин и öштас,
Сiйö ен ас дынас босьтас.
Мужик юрыт абу дона,
Эта нятьыс миян уна.
Ась миллион кöть усьö юр,
Мед лиш аслам эз бы сюр!..
Деревняын мыйкö кылö:
Кинкö горзö, али сьылö?!..
Юрнас петö коньöр морт,
Кольö ассис чужан горт.