Комиэз-воннэз,
Уль вöрлöн зоннэз,
Тырмас ни жугыля овны!
Оннытö чапкö,
Юрнытö лэбтö,
Колö ни бур лунсö вöтны.
Дыр тiйö олiт —
Югытiсь полiт,
Йöзкöт эд лысьтö пантасьны:
Кин кöр и чужйö,
Кин кöр и сьöвзьö —
Эд лысьтö паныт шыасьны.
Лёк нимöн порсьöн,
Понöн да кöчöн
Быд тэнö отир пыр шуис;
Мылатö гырксит,
Пым виртö яйсит
Черань моз ой и лун юис.
Öнi, кöр воля
Шондiöн локтiс,
Ки-коктö разис кöр тэныт,
Öнi, кöр тэнат
Син одзыт оссис
Повтöг мун шондiлань паныт!
Юр тэнат морт кодь,
Лысиныт кöрт кодь —
Вермö быд уджсö нуöтны,
Кымöра лунсö,
Лёк пемыт ойсö
Вермö куснясьтöг чулöтны.
Дак комиэз-воннэз,
Уль вöрлöн зоннэз,
Тiянлö колö я повны; —
Юрнытö лэбтö,
Öтлаö öксьö,
Нюрись бур туй вылö петö!
КОМИ МОРТЛÖ
Коми отир, тырмас узьны,
Порсьмоз нятьын боккез пöжны.
Чеччö, сувтам кок йылö,
Да чукöртчам öтлаö.
Öта-мöдлö киэз сетам,
Кытш паськытжыкö лöсьöтам,
Сувтам мувлö веськыта,
Тальччам кокöн чорыта.
Кинi кöркö миян одзын
Олöм эстöн Коми мувлын,
Пемыт вöрсö ректöма,
Ловсö ассис пуктöма?
Миян айез, миян деддэз —
Миян бытшöм Коми Морттэз!
Нiя эстöн олöмась,
Köзяиннас вöлöмась.
Öй, Миков, тэ дугды бöрдны,
Бöрдöмöн некин оз вермы.
Сiдз олансö он кокньöт,
И некöр тэ он ло пöт.
Лок-ко лутшö öтлаö да
Китö мыччы миянлö, да
Öнi кывзы — юрат варт,
Да эн шу, што кинкö враг...
Аслат грекын мыжа тэ —
Важын тöда тэнö ме!
Одз тэ мöдiн йöзö петны —
Коми мортöс рочö пöртны:
Весь пышшалiн сы дырна,
Кывтö чегин сы бурна.
Тэ думайтiн — мыйö этö
Рочыс пöртас комиэтö.
Сiя адззан мымда сетiс —
Коми кывлас книга петiс.
Адззан, кыдзи том и пöрись
Оз и кольччы миян сьöрись.
Мыйкö сэтöн, видно, эм.
Мый тэ керан? Керны нем!
Кывзы, Миков, пöртчы мортö,
Лок-ко, лутшö, аслат гортö,
Рочыс ладор эн кежöт,
Коми мортсö эн вунöт.
Мунам ордчöн öтiк туйöт,
Керам öтласа ми кыйöт —
Коми мортöс петкöтам,
Бур оланöдз вайöтам.