Кöркö вöлi озыр Пиля,
Коньöр йöзсö сöскис зiля —
Зепсö тыртiс.
Нёль во сьöрна старшиналiс
Мир казнаöн богатсялiс —
Горшсö тупкис.
Уна отир лэдзис кортöн,
Коньöр мортöс эз шу мортöн —
Вылö лыйлiс.
Совет лась дыр шай-пай лоис,
Пемыт ойö гортсö колис —
Вöрö пышшис.
Локтiс чочком — быдöс вийис,
Резiс-пазiс, ульöн сёйис —
Олöм дзугис.
Озыр Пиля вöрись петiс, —
Коньöр йöзлö мыжсö сетiс —
Пöртiс мортö.
Самогонка ой-лун пусьö,
Господакöт Пиля юсьö —
Öмдор мавтö.
Рыт и асыв комендантлö
Сякöй юöр нуö-вайö —
Йöз вачкöтö.
Быд соседсö куртö-картö,
Коньöр йöзлiсь сюэз вартö —
Ме пö ачым.
Ме пö сета гöрдын овны,
Миян кодьлö паныт лоны —
Пиннез сёйны.
Уна Пиля стрöйдiс йöзöс,
Кытчöдз гöрддэз чочкоммезöс
Эзö резö.
Дыр оз вунöт отир Пильöс,
Кыдзи кöркö сiя тiлис
Коньöр йöзöс.