Пемыт ойöн да арся кадöн,
Ок, кöркö менö мамö чужтöма.
Сизим арöн да шöрттöм дöра,
Ок, паськыт мувлас панны тшöктöма.
Муна лэдзча да Лöзъясинмö,
Ок, Иньвадорсö дыр ме видзöта.
Кыска писим да чочком чышьян,
Ок, макнита да свись ме шутньöвта.
Сэки локтас да бытшöм нылöй,
Ок, Öниссяö Ыджыт Шулайись.
Локтас бокам да пуксяс матö,
Ок, шогöс пондас пöльтны сьöлöмись.
Босьта киö ме гармоння,
Ок, пики-вики öтпыр керышта,
А сыбöрын да бокö чапка,
Ок, Öниссяöс раз-мöд окышта.
ТОМ НЫВВЕЗЛÖ
Лöсьöтöм зырянскöйись
Гöгрöс чужöммез,
Вира чужöммез,
Басöк каджоккез,
Чожа серöммез,
Бытшöм ныввезöй! (кыкись)
Öтпыр олатö,
Чожа быратö,
Кыдз тай ыб зарич
Чожа косьматö.
Арöн киссятö, (кыкись)
Сьылö, гажöтчö
Гажа том кадас,
Кужö овнытö
Чвета пораас.
Шогö эд сетчö. (кыкись)
Пемыт думаэз
Юрись вашöтö,
Умöль олансö
Бокö вештыштö
Гажа писняöн. (кыкись)
Гöгрöс чужöммез,
Вира чужöммез,
Гора голоссэз,
Басöк каджоккез,
Кужö овнытö. (кыкись)