Эшö тöн менам
Эта пораö
Öддьöн личкасис
Шогöн сьöлöмö.
Эшö тöн рытсянь
Видзчися эстöн
Ассим мусукöс
Да сердешнöйöс.
Шондi рас сайсянь
Воно петö ни,
Менам мусукö
Некö локтö ни.
Муна сы дынö
Паныт котöрта,
Морос бердас ме
Сылö ыжмитча,
Басöк чужöмсö
Кута окала,
Вöлись сыбöрсянь
Босьта висьтала:
Ок тэ, сердешнöй
Менам другиньöй,
Батюшкоиньöй,
Сьöлöмшöриньöй!
Менö гортын эд
Тэтöг сёйисö —
Мöдi морт сайö
Рытнас юисö.
Ашын ки кутны
Бöра локтасö,
А кресенняас
Венеч пуктасö.
Токо айöлö
Тöн ме висьталi:
Мыся, ог ме веж
Другöс срамыслö,
Мыся, сьöлöмам
Лучше пурт мöртö
Нето пельпонлiсь
Менчим юр босьтö,
Токо Ванюкöт
Эдö янсöтö,
Нечулимыслö
Менö эд сетö!..
Айö пондiс сэк
Лöгöн видчыны,
Мамö гор вылын
Норöн горзыны:
Мыйлö тэнö пö
Инö быдтiмö,
Удiм-вердiмö,
Мортö воштiмö,
Кöр тэ он кывзы
Айлiсь-мамлiсь кыв,
Тэ пö кытшöм нö
Нылö сэки ныв?
Босьт пö конувтат
Öтiк нинкöм гоз
Да мун шатласьны
Шатун Паладь моз!
Сэки пондi ме
Норöн горзыны,
Айö-мамöлö
Причот пуктыны:
Мыйлö, мыся, тэ
Менö, маминьöй,
Кöркö чужтöмыт,
Кöркö быдтöмыт?
Мыйлö йöзö тэ
Менö лэдзöмыт,
Мыля юр вылам
Абу тальччöмыт?
Буржык вöлi бы
Муын сiсьмыны,
Чем бы кыввесö
Энö кывзыны!..
Эшö ёнжыка
Айö рякöстiс,
Локтiс, тойыштiс,
Юрöс кватитiс.
Пондiс кыскавны
Менö чикисьöт,
Тальны-чужьявны
Чочком моросöс.
Сэсся ыбöссö
Паськыта осьтiс,
Ворота сайö
Менö тойыштiс.
Мун пö вакрамеш
Тэ, лешаклöн ныв,
Мед пö ме тэнчит
Эг и след адззыв!..
Ачыс пырис да
Мыйкö брякнитiс,
Лöгöн мамöлö
Мыйкö горöтчис...
Ворота саяс
Дыр ме сулалi:
Кытчö мунны бы,
Пыр ме думайтi.
Петi ыб вылö,
Пукси межавлö,
Пондi видзöтны
Асыв ладорö.
Öтi местаас
Ойбыт пукалi,
Тэнчит локтöмтö
Пыр ме видзчиси.
Ой, некин оз тöд
Менчим олöмöс,
Некин оз бурöт
Менчим сьöлöмöс.
Токо öтнат тэ,
Менам сердешнöй,
Менö бурöтан,
Менö гажöтан.