Шондi вылына
Ветлö небоöт,
Шоныт югöрнас
Орсö-дзардалö.
Мувлын васиннэс
Жагвыв ямöны,
Веж турун шöрын
Чветтэз кайöны.
Лунвыв ладорсянь
Небыт тöв руок
Чöскыт уль дукöн
Пöльтö-вайöтö.
Тэнчит чужöмтö,
Бытьтö урбöжöн,
Сiя долыта
Паныт малалö.
Паськыт видз шöрын
Сякöй дзоридзыс,
Сякöй рöмаыс
Öтнёж петöма,
Юррез шондiлань
Быдыс лэбтöма,
Мича, гажаа
Чветö оссьöма.
Мунан-мунан да
Кокнат кыйыштсян,
Веж турун увтö
Юрнат нырыштсян.
Куйлан, он вöрзьöт
Ассит ки не кок.
Гöгöр чöскыт дук,
Увтат небыт шовк.
Куйлан, лöнялан,
Пыдi лолалан,
Вылö лöз рöмас
Синнат мöртчöтан.
Тöвлöн шургöмыс
Тэнö дюттьöтлö,
Пулöн вашкöмыс
Тэнö лапкöтö,
Кайлöн дзульзьöмыс
Тэнö ланьтöтö.
Куйлан му вылын —
Он и тöд асьтö.
Бытьтö абу тэ
Ачыт морт родiсь,
Бытьтö этiя
Пыдын лöз бердiсь,
Бытьтö лöз рöмас
Кöнкö öшалан,
Борда пöткакöт
Вылын тшöтшасян.
Вот кысянькöсянь
Мича иыввезлöн
Гажа сьыланкыв
Тöвйыв локтыштiс.
Визыв ва кузя
Валöн койыштiс,
Гора вöр вывтi
Говкöн паськалiс.
Вон и асьныс ни
Тшöк кыдззаинiсь
Жагвыв петöны,
Кыдз ва пöткаэз
Гожся асывсö
Вавлöт кывтöны.
Гöрд йöрнöссэзныс,
Сарапаннэзныс,
Кыдзи мак чветтэз,
Нывлын öзйöны,
Синмын чеччöны.
Кыз чикиссезныс
Кос увдöрöдз пыр
Ленточкиэзöн
Тöвйыв павкйöны.
Асьныс гажаöсь,
Öмидз вираöсь.
Кöзаоккез моз
Тойласиг тырйи
Нiя видз шöрö
Пыр котöртiсö.
Сэтчин кöсiнö,
Лапыт кыдз увтö
Кытшö пуксисö,
Горöн, гажöна
Сьывны пондiсö;
Ылö ва сайö
Писня паськалö,
Пемыт вöр вывтi
Говкöн дöвьялö.
Рытъя кадö, кöр
Юр öшöтöмöн,
Порой нiйö тэ
Кывзан вель дыра,
Кытшöм думаэз
Тэнат юрö сэк
Токо оз пырö,
Мый эд сьöлöмтö
Нiя моросат
Тэнчит оз керö!
Кокнит пöткаö
Вот друг пöртчин бы,
Сöстöм нёбоöт
Пыр лэбалiн бы,
Нето пöртчин бы
Быдöс вермисьö,
Гортся олантö
Вужнас бергöтiн.
Керин мöднёж бы,
Бура-бытшöма,
Кыдзи этiя
Гожся луныс то.