Олат-вылат комиэз,
Эмаэз и эмтöммез,
Ыджыттэз и учöттэз,
Начальниккез и ме коддес,
Пöриссез и томмез,
Нывкаэз и зоннэз,
Тошаöсь и тоштöмöсь,
Бöжаöсь и бöжтöмöсь,
Вылына ныр видзиссез,
Кок пята нюлiссез,
Баня стыннэз бöрйиссез,
Кöч йöв пуиссез,
Садьтöг куйлiссез —
Быдöннытлö ме копрася,
Быдöнныткöт ме окася,
Быдöннытлö ыста бур юöр!
Сетö меным, мортшöнлö,
Кыв-мöд шуны тiянлö.
Кывзö да эд дивитö,
Мортшöнöс эд судитö.
Кыдз мый аркмас,
Сiдз и гарддя:
Кинöс окышта,
Кинöс кокышта,
Кöдö, он тöд, дойда...
Быдöннытö пешлыны понда.
Мыйсянь жö пондöтчамö?
Умöльсянь, вайö, кутамö,
Сiйö перво сотамö,
Сэсся басни вежам
Да бурланьö кежам.
Перво босьта ассим горт.
Эм миянын öтiк морт:
Лякöсь ныра, мывдкыд юра,
Юрси шпынöн — бытьтö сюра;
Öмас татшкöм гормöтчан,
Ачыс сьöд, кыдзи чиган.
Шабуржуг вылас кышалöм,
Кыйöм гезöн асыкалöм,
Веськыт кокас кöс котi,
А шульгаас — отопки.
Мунö — бедьöн дзурликасьö,
Öтöр-мöдöрö дöвьясьö.
Кытчö тальччас, сэтчö парс —
Горöн петас умöль газ.
Сiя олö по-сиротски,
Зыкйö-узьö по-господски.
Кыдзи шедö кынöмпöт,
Сiя оз сiйö и тöд.
Нюжласьöмöн гортсис петас,
Тури нырсö вывлань лэбтас.
Кысянь локтö брага дук,
Сэтчö мунас, пырас тюк.
Гобеч бок гöгöрö сувтас,
Умöль басни гындны кутас.
Сэсся кöть тэ ловтö сет,
Кытчöдз он уд, оз и пет.
Сёяс-юас, вöлись петас,
Мунас гортас, бöра водас.
Саркйö-узьö кузь лунтыр,
Токо сьылö, батя, ныр.
Аслас челядь керку тырьяс,
Горвыв сёрдын кыдзи мыррез.
Сёйтöм-ютöмöсь прокод,
Зато ачыс вексö код.
А кöр ковсяс бы уджыштны,
Додь турун, шуам, вайыштны,
Сiйö лутшö эн вöрöт:
Настояшшöй кыдзи кöрт.
Шуас: талун пö шогала,
Уджö пета, кöр веськала.
А то гарьяс празьниклун,
Нето дедыслiсь нимлун.
Вот сiдз бокöн пыр и петö,
Век кытшöмкö немтор кöтö.
Сылö уджыс — вöрись ош,
Гöрöдалö, тупкö горш.
Шуöны тай: кöркö томнас
Вöлöм бытшöм — удав зоныс.
Вöлöм мыла, вöлöм прок,
Дас кыным пö тыртöм срок.
Сьöд нуждакöт тiльсьöм-пессьöм.
Сэсся мывкыдпонсис вежсьöм:
«Пропадай пö, коли сiдз, —
Кинлö ульлун, кинлö видз!»
Кывзö, челядь, эшö вот мый:
Миян местын празьник коста
Вексö мунö зык да ссора.
Пуас каждöй самокур,
Керас тагья брага-сур.
Шентö-юö том и пöрись,
Оз и лэдзчö кружка дорись.
Юас, польдас, кыдз ваполь,
Мунö, кыссьö, кыдзи лёль.
Мымда вермö — мöс моз баксö,
Дуль-зырымнас гöгöр ляксьö,
Лэдзö кыккусiня мать
Да горöтö: «Изломать!».
Гортö локтас, иньлö дöвгас,
Пызан пöвлö кинас ковгас:
«Изломать пö, кто пришов?
Али менчим тэ он пов?!
Кто пö эм кöзяин дома?
Ме пö ачым — Ляксюр Пома!
Кто пö строил этöт дом?—
Тодель лэбтас зык-содом.
Вирс-варс иньлiсь чужöм керас,
Жиля-жоля öшын лэдзас,
Иньдас öтöрö, мый эм:
Бекöр-пань и джаджись ен.
Ашынас рытъявдор саймас,
Юрсö лэбтас, сэтчö паймас:
«Но, лешак, кытöн нö толк,
Керкуам тай чеган кок.
Ыджыт тöв не я кö мунöм?..»
Тöння кадыс бытьтö вунöм.
Мый эд керан? Керны нем,
Сякöй морт миянын эм.
Кабак одзöт öтпыр муна,
Адзза, отир сэтчин уна:
Кöда нюшкö шкаличок,
Кöда нюлö голюнок,
Кöда сёрни кöдзö-койö,
Кöда нырнас мусö войö.
Но прошшай бöра, пятак:
Загуляв талун пермяк!..
Куим ойкöв ветлiс туйö,
Куим руб пö локтöм киö.
Öтiк рубöн вердiс вöв,
Мöдлö ачыс пöт эз вöв,
Куимöтыс, кыдзи шыр,
Кошель дорсö йирö пыр.
«Пропадай, менам нинкöммез,
Ась пытшыннэс колясö!..
Ноко, öксям, коми воннэз,
Керамö складынясö!»
Öксисö да керисö,
Кабак пытшкö пырисö.
Весёв-весёв коми морт,
Вунöм сылöн талун горт.
Кабак одзын чатрасьö,
Чатрасьö да ошшасьö:
Кыдз я ме пö коми морт,
Вежöра, уджалiсь ёрт,
Менам гортын спорина,
Поснит челядь вельтума.
Пода туйö пон да кань,
Залавкаын öтiк пань.
Пропадай последньöй грош,
Ме эд мортыс абу горш!»
То мукöд и гортас босьтас,
Буддень лунö празьник осьтас.
Вот миянын Косогор
Сэтöн вексö тыри-ёр.
Деревняас сизим керку.
Шöрас олö дöва Перку.
Сэтöн вексö мунö пир.
Пирыс ыджыт: на весь мир.
Пызан вылын сякöй берся,
Керку шöрас мый и керсьö:
Катя монь — Трöш монь —
Чочком кока, мича вонь,
Брага туисöн удасьö,
Басöк коккезнас мыччасьö.
Питюок-петушок,
Сопьяок-курöжок
Паныт-паныт тусь масьтöны,
Дорвыв чер-барöн ветлöны.
Быздыль Ёгор — тöвзыр тош,
Сеня Васька — гöна ош
Порог увтын веснясьöны,
Ош мыгöрöн ошшасьöны.
Сьöд Пиля — мошка,
Пилика — тятявка,
Öрин-Öрин — бекöр öм,
Сюли-пали — торта öм
Ком лабичö кытш керöмöсь,
Киись киö кутчисьöмöсь,
Öмись öмö видзöтöны,
Важся писня нюжöтöны,
Купеч Ёгор мышкырасьö,
Даду Сеника сунасьö,
А мöс юр Игнатей гозйöн
Нырнас тюкö курöг позйын.
Лун чулалiс, ой чулалö,
Перку ордын пир кылалö:
Токо кылö тыри-ёр —
Вот деревня Косогор!
А ме одз чечча,
Шор дорö лэдзча.
Пеганукаöс кута
Да йöр гöгöрсö гöгöрта.
Йöр гöгöрсö гöгöрта
Да сэтчö öтлаö пыра.
Перкуиньöй-сваттюшка,
Да пантав гöсьтö, матушка
Перкуыс, чу, чижьялö
Да гöсьсö ассис панталö.
«Пыр жö, пыр жö, сватiньöй!
Да пыр жö, дона гöсиньöй!
Тэнö ме дыр видзчися
Да чöскыт вöтöн вöтася.
Тэныт керöм менам сур,
Тагья брага бурся-бур.
Сёрнитыштам, пукыштам
Да брага-сурсö юыштам.
Брага-сурсö юыштам
Да важся олöм касьтыштам.
Важся олöм, том олöм
Да гажа кадсö чулöтöм.
Эшö чуш йöктыштам,
Эшö вот мый сьылыштам:
Кык морт йöктö,
Куимöтыс рöктö.
Нёльöт-витöт чатрасьöны —
Бытшöма тай каджжасьöны.
Кватьöт кокнас куртö-картö,
Пидзöс понас кинас вартö.
Сизимöтöс оз узьöт,
А дасöтöс оз сулöт.
Пик-вик гармоння,
Кин тэнö керöма?
Петра Провка,
Петрика — воровка,
Ёгор-Ёгор — баня гор
Да быздыль Мишка — кузь багор.
Жаралi да жаралi
Да керöс увтас таралi.
Чеччыштi, сувтыштi,
Ляп Öринöс кутыштi,
Чуп-чуп окыштi,
Юр чышьян козьныштi.
— Öринушенька-дитя,
Да модззет тэнат пö кыка.
Куимöтыс лоа ме,
Да мый нö шуан сэтчö тэ?
— Мун сэсь, лёквир,
Мый лякасин, кыдз сир.
Менам модзö заводскöй,
Да сылöн паськöм городскöй,
Дзурк-вирк сапоги.
Меным ваяс ботинки.
Ботинкиыс дзуртö,
Модзö менö буртö:
Окыштö, ошкыштö,
Пель одзам вашкö,
Öтöрын кашкö,
Гуся каньöн гусясьö
Да карта бöрын видзчисьö,
Да кöдзыт кадöн кынтiсьö.
Вот…