Октяб революциялöн
дасöт во кежö
Ойшöрся пемытiсь,
Векся лёк кад увтiсь,
Гургöмöн, чардбиöн
Петiс Октяб!
Тöв нырöн нырыштiс,
Гöрд биöн паськалiс,
Сяркöтiс, разьöтiс
Лёк олан кад!
Ойшöрся пемытö
Тiльсис юр вевдöрö,
Югыта паськалiс —
Öзйис гöрд чвет!
Пöдöм йöз ловзисö,
Öксисö, лэбисö,
Бур гажа асылö
Мыччисö вын!
Вирьюись кырнышлiсь,
Кузь гыжа варышлiсь
Нетшкисö-панiсö
Ор-вир-яй горш!
Вöталöм волясö —
Зарни би рöмасö
Крепыта сапнитiс
Гаддя куш ки!
ГАЖАЖЫК, КОМИЭЗ, ÖЛÖ
Гажажык, комиэз, олö,
Шогсьыны, бöрдны оз ков.
Кулöмись некöр эд полö:
Некöр оз кус миян лов!
Быдкодь адззылiм шогöттэз,
Жалейтiсь некин эз вöв.
Вунöтам сiйö, кыдз вöттэз.
Шогсö мед нöбöтiс тöв.
Некöр шоччисьöм эг тöдлö:
Кошшим ми пыр кынöмпöт.
Смевжыка, комиэз, ветлö,
Миянöс адззисö мед.
Пондам ми смевжыка овны,
Миянлö шог — абу шог.
Дугдам ми лёккезiсь повны:
Лёккеслö асьным ми лёк.
Гажажык, комиэз, олö,
Кытчöдз высинныт эз быр.
Миянлö гажыс и колö, —
Лоас ась гаж олан пыр!