Челядь, локтö мастерскöйезö ветлам,
Уджалöмсö мастерскöйлiсь видзöтам.
Вот джодж шöрö сувтöм Пиля — няньзыр тош,
Паськыт черöн сiя лотшкö: клотш да клотш.
Ылö-вылö лэбзьö чер увтiсь кöс чаг,
Потолокö локтö-инмö чак да чак.
А кыдз пондасö пилитны гизь да гизь,
Пила увтiсь зэрöн киссьö пильнöй пизь.
Вот стружитчöны кык том морт гуж да гуж,
Ветлö орсöмöн ны киын лэчыт струж.
Стружки гöгыльöн чачаö аркмö тыр,
Нiйöн орсамö быд нёжöн ми вель дыр.
Волькыт пöлiсь чожа аркмас виль пызан,
Пызан саяс ми велöтчыны пондам.
Кыдз ми осьтам коми книга «Виль олан»,
Да кыдз сярзьыны-лыддьöтны ми пондам,
Айлöн-маммезнымлöн дурмас нельки юр, —
Зато пырас миян юрö вежöр бур.
Да кыскамö ми пеналiсь карандаш,
Да кыдз кутчам мийö гижсьыны гыж-важ.
Дума киссьö, дума киссьö, кыдзи зэр, —
Ок, велöтча, ачым лоа инженер.