Мийö челядь öксим уна,
Мунiм вöрö вайны тшак;
Кин öшöтöма виль зобна,
Кинлöн зэв ыджыт бурак.
Уль вöр сувтöм сьöд стенаöн,
Увтас пемыт, кыдзи гу.
Небыт нитш дзик перинаöн
Вевттьöм сылiсь кокувт му.
Миян гильзьöм горöн кылö.
Вöр саймöтö морт удав.
Горöтлöм паськалö ылö,
Токо мунö ув да ав!..
Ыджыт кöзын, пройез увтын
Миян шывлö петiс ур.
А кытöнкö гырка пуын
Сьöд кыр нырнас керис — тррр!
Кыськö бокись, лыскыр увтiсь
Шумöн пургис-лэбзис тар;
Кыськö кöч чепöссис, сувтiс,
Вылын рака карзö — каррр!
КОМИ ВЕЛÖТЧИСЬЛÖ
Олан-вöлан, бур мортiньöй,
Коми велöтчисиньöй!
Сьöлöмсянь тэныт ыста юöр,
Мед бытшöм лоис сякöй тор.
Высиныт мед эз кусiньтчы,
Сьöлöмыт ась оз дзугыльтчы.
Уль вöр шöрись, деревняись,
Уджалiсь пемыт вöр пытшкись,
Тэ локтiн татчö школаö
Ёнмöтны ассит мывкыдтö,
Велöтчыны, гажöтчыны
Да тöдiсь мортö пöртчыны.
Чулалас год, чулалас кык,
Тэ лоан сэки нач мöдiк —
Пыдöжык пондан видзöтны,
Унажык пондан адззыны.
Быд оланлöн сьöд гыжвужыс
Лёк йöзлöн сякöй падежыс
Тыдавны пондас син одзын,
Кыдз майся рытö ва дорын.
Сэк кык туй одзат водасö,
Кыкнанныс корны пондасö,
Мед мунiн бы öтiк вылöт,
Мед мунiн бы мöдiк вылöт.
Öт туйыс волькыт, чветтэза,
А мöдыс нятя, жельнöга.
Öт туйöт озыр морт ветлö,
Мöдiклiсь кöда вир юö.
А нятя туйöт куш мунö,
Мöдiклö кöда бур керö.
Думайттöг тэ эн кинитчы,
Мед сыбöрын эн каитчы —
Што мунсьöм пö не сэтi тай —
Эг адззы мувлiсь ассим рай.
Эн вунöт ассит чужöмтö,
Челядь кадся зэв мырсьöмтö,
Уль вöр коласiсь петöмтö,
Сьöд мыррез шöрын быдмöмтö!
Эн вунöт, што деревняын
Бус пытшкын да нять пытшкын
Тэнат воннэз кольччисö,
Кöдна тэкöт быдмисö:
Тшын бусас да нять пытшкас,
Багсялöм чорыт нянь дорас,
Кыдз тшаккез вöрын, рушмöны,
Кыдз гуттэз, нiя кулöны...
Вот эм кö тэнат мылаыт,
Да пизьö гыркат пым вирыт —
Мун веськыта кузь туй кузя,
Эн кеж мöдiквас чветаас.
Эд чветтэс нiя кайöмась
Уджалiсь отир шой вылö.
Так коми морт, велöтчись морт,
Эн вунöт жö тэ ассит горт!..
И ёнмöм, бурмöм мывкыдтö,
И ассит долыт олантö —
Быдöс сет аслат воннэзлö,
Кайöт тэ нiйö керöслö,
Мед дугдасö ни пöднытö,
Мед дугдасö ни кувнытö!!!