Иньва дорсянь вöр шöрö
Чуклясьöмöн туй мунö:
Пуэс сiйö жмитöмась,
Бытьтö гагö пöртöмась.
Ылö-ылö сiя сiдз
Мунö, кытчöдз оз лок видз,
А сы бöрын кежöтö
Югыт визыв шор дорö.
Сэтöн, эта шор дорын,
Рас дор паськыт кушинын
Юртöм керку сулалö,
Ассис боксö мыччалö.
Карта стоббес пöрöмась,
Воротаэс киссьöмась.
Öшынö стекло туйö
Брушина пелитöмась.
Посöдзыс лэдзчисьöма.
Угöв потшöн пыкöма —
Ылiсянь кö дзар керан —
Бытьтö пöрись морт адззан.
Бытьтö бедьвлас нырыштчöм,
Юрсö ассис öшöтöм,
Пöрись вывсис думайтö —
Кольны олансö мöдö. —
Ком угöв öшын весьтö,
Векнит канава дорö
Ыджыт льöмпу быдмöма,
Керку юрсö вевттьöма.
Вылiсь уввес косьмöмась,
Улiссес чеглалöмась,
Важ листтэс кельдöтöмась,
Кок увтас усялöмась.
Важся эта льöмпуыс!..
Оз и тöд кöзяинсö
Кин сiйö пуксьöтöма —
Вердöма, зорöтöма.
Оз тöд рас дор кушиныс,
Оз тöд нельки керкуыс,
Кысянь сiя лоöма —
Сы пасьта паськалöма.
Тöдö öтiк токо шор,
Кöда дзольгö кырас дор —
(Чорыт изсö гыжьялö,
Ва пыдöссö паськöтö).
Часто, порой ой шöрöн,
Кöр узьöтö бур онöн,
Сiя пукöт сёрнитö —
Важ олöмсö висьтасьö.
— Важын, важын эстöн вот
Кöркö олöма пö морт,
Сьöд Мичорöн шусьöма,
Кöинöн нимтiсьöма.
Локтöм сiя асывсянь,
Паськыт Кама ва сайсянь
Сэтчин олöм разбойöн,
Висьтасьöма тöдiсьöн.
Тöдлöм бытьтö шуч и шуч,
Кужлöм керны мортiсь руч.
Кама васö прудитлöм,
Кымöрресö пыклывлöм.