Ок, не тэ я, Терентий ёрт,
Чеччан ойся ойöн пыр;
Да не тэ я ыбвыв шöрын
Ниртан уджсö йöзся дыр.
Ок, не тэ я, Терентий ёрт,
Коран еныслiсь спорина.
Медбöрьятö куртан-картан,
Шуан поплö: «Бать пö на».
Ок, не тэ я эта понда
Новьян бырöм лöз шабур,
Челядёкыт горвыв сёрдын
Вишкö сёйтöг, кыдзи ур.
Да не тэныт я, Терентий,
Виль оланыс — вöрись ош,
Тöдiсь йöзлöн веськыт кылыс
Гöрöдалö, тупкö горш.
Да не тэнат я, бур мортлöн,
Сю тусь туяс кöдзсьö ёг,
Страда пора быд ыб пасьта
Вундан туяс — ытшкöмпод?
Да не тэ я, коми мортöй,
Прокод висян, шуан: «Шог!»
Доктор дынö мунны полан,
Шуан: «Тöдiсь сетас мог»
Да не тэнö я, Терентий,
Завид босьтö лун и ой,
Кöр соседыт тэкöт ордчöн
Тöдö удж да долыт ой.
Кытöн эстöн споринаыс,
Кытöн, шуан, эстöн лад?
Öтiк олö бытьтö райын,
Мöдiк ас вылас не рад.
Ок тэ, мортушко, Терентий,
Кыз кучика тэ порсь род.
Он разь адззы — важ оланат
Бурыс немымда оз сод.
Бур олан эд миян киын —
Мортыс ачыс керö — ов.
Важ олантö чапкы биö —
Виль оланат пö — виль лов!
Колö пöртчыны ни мортö,
Мед ни коляс важся кад,
Мед син одзат тэныт оссяс,
Мед ни сьöлöм лоас рад.