Кресенняö видззез кузя
Насту гортас лэдзчö.
Шоголь Петра, дзарьялöмöн,
Насту сьöрö вöтчö.
Шутньöвтыштас, кашельтыштас,
Джын голоснас шуас:
«Насту, лёквир, видзчись, мыся...
Сьöлöм пикöдз мунас!..»
«Дугды, Петра!.. Мун, эн ылав!..
Мый кошшыны вöтчан?..
Вон кенакö локтö бöрам,
Подбрань менö воштан».
Чужöмбаныс аслас орсö,
Сьöлöм öмöт петö...
Серöмтчöмöн, шынньöвтчöмöн
Ки Петралö сетö.
Петра гусьöн мыйкö вашкö,
Ки Настулiсь кутö.
Тэрмасьöмöн, пöртмасьöмöн
Морос бердас жмитö.
Гажа нылö, долыт нылö.
Том вир ёна орсö.
Гора чупкöм ылö кылö,
Чалöтö вöр дорсö.