Вадöр дорын ва кайöттöн,
Меным сiя шуис:
«Ашын ойшöр бöра вовлы,
Гажтöмыт кö кутiс!»
Лунтыр талун сьöлöм косьмö,
Оз пыр киö немыс:
Кöр ни, мыся, ойыс локтас?
Кöть бы чожжык пемдiс!
Öдва кыдзкö курöг позын
Петук ойшöр сьылiс.
Онтöм юрлöн — Сеня дядьлöн —
Би öшынiсь кусiс.
Гуся каньöн, маласьöмöн,
Кышыштi ме поньток,
Тöдса туйöт мусук дынö
Шыбыльтi ме повтöг.
Тöвся ойыс шучкöп кöдзыт,
Ныртö сiдз и сотö.
Но да томлöн пым сьöлöмыт
Вывтыр бура шонтö.
Тöдсаинын, карта бöрын
Видзчися ме нылöс.
Коклiсь коклö чеччалöмöн
Шонта ассим вылöс.
Падеж мороз кыдз нарошно
Быдлаинö сидзö.
Мича нылыт шонытiнат
Чöскыт онöн узьö.
Дудi менам, акань менам,
Зора тупыль, масiсь,
Зоныт дынö, корин тай да,
Он я петны кöсйись?
Он кö ачыт петны кöсйись,
Мыччышт кöть нö ныртö —
Мед морозыс менчим моз жö
Чепöльтö да кынтö!..
Шы не тöв сiдз карта бöрын.
Мороз оз и ямлы.
Быдöс чильдi видзчисьöмлö... ―
Вартны згорья кайны!..