Арт. 1. Вси обыватели великого князства Литовского одним правом писаним й от нас даным сужены быть мають... почоншы от вышнего стану аж й до нижнего, тыми одными правы писаными от нас даными судити исправовати.
Арт. 2. Мы господар обецуем й шлюбуєм никого не карати на заочное поведанье, хотя бы се дотикало й о ображенье маєстату нашого господарского ...А хто бы теж кого колвек обмовляючи вчинил к соромото й зелжывости, а шло бы о честь або о горло або о которое кольвек скаранье; тогды тот, хто на кого мовит й ведет, а не доведет, тым караньем сам маеть быти каран.
Арт. 3. О ображенье маестату господарского. О ображенье маестату господарского так се разумеет, колибы хто змову албо спикненье албо бунт учинил на здоровье наше господарское, хотя бы пан бог уховал, иж бы оная змова не была учынком пополнена; таковый за слушным доводом, як о том нижой описано, честь й горло й именье стратит. Теж кгды маєстат наш ображон бывает с тое причыны, кгды бы хто бунтовал покой посполитый врушаючы против нас господара ку шкоде й речы посполитое ...
РОЗДЕЛ ТРЕТИЙ
О вольностях шляхецских и о розмноженью
великого князства Литовского
Арт. 1. О розмноженью великого князства Литовского. Мы господар обецуем теж й шлюбуєм за себе й за потомки наши великие князи Литовские под тоюж присегою нашою, которую есьмо учинили всим обывателем всих земль великого князства Литовского й всих земль ку нему здавна й тепер належачих у славе, титуле, столицы, зацность, й владзы, й можность роска зованью, й в иншых всих належностях й прислухиванью й в границах ни в чом не вменшати й о вшем примножати.... за щастливого панованья своего чынити стеречы й боронити будем, с помочью божьего стараючисе о примноженье й вывышенья того панства й всих станов достойности оздоб й пожытков з наиболшого пилностью й всилованьем нашим.
Арт. 2. О вольностях шляхецских. Теж мы господар обецуем словом нашим за нас й за потомки наши великие князи Литовские под таким же обовязком нашим, яко вышей у первом артикуле ест описано, иж всих князей й панов рад, як духовных, так й свецских, й всех врядников земских й дворных, панов хоруговных, шляхту, рыцарство, мещане й всих людей посполитых у великом князстве Литовском й во всих землях того панства нам заховати при свободах й вольностях хрестиянских, в которых они, яко люде вольные, вольно обираючи из стародавна из вечных своих продков собе панов й Господарей великих князей Литовских, жыли й справовали прикладом й способом волных панств хрестиянских,...
Арт. 3. Мы господар обецуем размножати великое князство Литовское...
Арт. 37. Хто бы именье от нас даное в кого отыймовал. Теж уставуем, кому быхмо мы господар именье або люди й земли дали, а хто иншый по той данине нашой тое именье отнял; тогды тот, у кого отнято, можеть того доходити й правом поискивати, нижли большей искати не можеть одно, яко ему дано й як на нас господаря то держано, толко бы давности земское от того часу, яко ему дали, не омешкал.
Арт. 39. Мы господар шлюбуем однакую справедливость всим чинить, а [пересуду] мы й Панове ради наши брати не маем. Обецуем теж з ласки й добрости й милости нашой господарской ку подданным нашим, всему рицерству великого князства Литовского, под сумненьем нашим, иж мы господар й Панове рада наши маєм кождому стану всим заровно однакую справедливость чинить без отволоки, а от права не маем ничого брати; ... А што се дотычеть почтивостей шляхецских, а то жаден с панов рад ани суд замковый ани теж суд земский поветовый не маеть судити, толко мы сами господар с порадою панов рад наших великого князства Литовского судити маем обычаем вышейписаным. Ведже што здавна й теперь в сем статуте суду замковому належыть, то суд замковый судити й отправовати маеть.