Кәсіптік білім беру жүйесінің мазмұны. Бастауыш кәсіптік білім беру.

Білім мазмұны – бұл тиісті орында жүйеге келтірілген білім, білік және

дағдыларды игеру барысы және нәтижесі, оқушыны өмірге және еңбекке

дайындаудың қажетті шарты. Еліміздегі экономика және өндіріс салаларының дамуына байланысты жұмысшы мамандарға деген сұраныс күн санап артып келеді. Қазіргі кезеңде елімізге өркениет әлемінің озық технологияларын меңгерген, жаңа заман талабына сай кәсіптік білімі бар, сапалы да білікті мамандар қажеттілігі туындап отыр.

Елбасының жыл сайынғы Жолдауларында елімізде кәсіптік-техникалық

білім беру саласын дамытуға айрықша мән беріліп келеді. Оған айғақ – Елбасының «2030 стратегиялық бағдарламасында» берілген нақты тапсырмалардың жартысына жуығының білім беру, жастар тәрбиесіне арналуы. Сол сияқты, ҚР-ның «Білім туралы» Заңына өзгерістердің енгізілуі, ҚР Үкіметінің 2005 жылғы 28 ақпандағы №174 қаулысымен бекітілген кәсіптік бастауыш білімнің білім беру бағдарламаларын іске асыратын білім беру ұйымдары қызметінің үлгі ережелерінің қолданысқа енуі, жаңа ғасыр жастарын кәсіптік білімге тәрбиелеу бағытында жасалып жатқан басқа да шаралар еліміздің болашағы – бүгінгі жастардың жан-жақты білім алуына тікелей байланысты.

Орта кәсіптік мектептерде кәсіптік білім беру – инженер-педагог және педагогикалық ұжым мен оқушылардың бірлескен іс-әрекеті, олардың теориялық білім негіздері, практикалық қабілеттері мен кәсіптік дағдыларын қалыптастыру. Сонымен қатар, белгілі бір кәсіп саласы талап етіп отырған біліктіліктер деңгейін қалыптастыру.

Кәсіптік мектеп – кәсіптік білім беру жүйесіндегі болашақ білікті жұмысшыларды дайындайтын, оқытатын және тәрбиелейтін оқу орны. Кәсіптік мектеп педагогикалық жүйенің барлық белгілеріне ие. Оның мақсаты азаматтарды жұмысшы мамандығына даярлауда өз қабілеті мен қызығушылығына, мүмкіндігіне қарай білім беру, оларды қайта даярлау және кәсіптік біліктілігін көтеру. Кәсіптік мектепте оқу мерзімі 2-3 жыл. Кәсіптік бастауыш білім, кәсіптік мектептер мен кәсіптік негізгі жалпы білім беру базасында алынып, жалпы орта білім алумен ұштастырылады. Және ол еңбек қызметінің түрлі бағыттары бойынша білікті еңбек қызметкерлерін даярлауға бағытталған.

Кәсіптік мектептердегі оқыту құралдарына жалпы білім беретін орта мектептегіден басқа оқу құрал-жабдықтарымен қатар нақты заттық бөлшектер, кескіндер, макеттер сондай-ақ практикалық дағды қалыптастыратын түрлі оқу тренажерлері де жатады.

Кәсіптік мектеп білім алушылары - белгілі бір кәсіп саласына қызығушылығы бар негізгі және орта мектеп бітірген жастар. Негізгі білімі барлар үшін оқу мерзімі 3 жыл, ал толық орта білімді жастар үшін 1,5 жыл.

Сонымен, кәсіптік оқытудың маңыздылығы жайында басында да біраз сөз қозғалды, себебі, кәсіптік оқыту экономикаға, еңбек нарығына тікелей қатысты.

Кәсіптік мектептерде білім алушылар ауыл шаруашылық техникаларын теориялық тұрғыдан ғана оқып-үйреніп қоймай, техниканы жүргізу, баптау, пайдалануды, жер жыртуды және технологиялық агротехникалық технологияларды меңгере отырып, егін егу, одан мол өнім алу жолдарын да үйренуі тиіс.